Thursday 15 April 2010

Min nghilh bik suh ang che

Kum 2010 Farewell chu kan lo hmang zo leh ta der mai a! Kum khat hi a lo va rei lo tak em! Kan thiante, a thente phei chu kum tam tak hlim taka kan lo awmpui thin te'n nakin lawka min awmbo san tur han ngaihtuah hian lung a leng lawk ngei e.





Chennai, a bik takin Choolaimedu hi keini tan chuan a hlu a. Khawvel ram zau zawk ami te'n min hre lo a ni maithei. Mahse kan inpumkhatna leh inlungrualna te hi kan chhuang a, kan intitheihpui reng a ni. Kan awm chhung zawngin tu dang ngai bik lovin kan khawsa ho dial dial a; chhiatni thatniah Mizo takin kan in lawm tawnin kan in pui tlang thin a ni.


Mihausa leh mirethei inthliar hran lohna, mifel lua leh misual lua tia inla hrang awm lohna hmunah hian kan lung a awi ve tawk thei asin.


Mahse, kan zirlaipuite, kan thiante, kan unaute'n min awmbo san mai tur hi chu kan ngaih a ngam lo a ni. In tel lo chuan he hmun nuam tak hian nawmna a neih tawh loh kan hlau va, in awm lo tur hi kan sun lawk a ni.

Hun a ral ang a, kumte a liam ang. Thil pakhat chiah kan ngen a che u: kan thian duhtakte u, min theihnghilh bik suh ang che u aw.

Nghilh bik suh ang che kan hlim lai ni te
Suangtuahnaah pawh rauthla ang mai ni mahse
Keia tan zawng kan inthianthatna a hlu ngei e
Nghilh ni reng i awm dawn si lo keia tan
Min nghilh bik suh ang che ka thian duhtak

For more photos go to www.chennaimizo.com.

Be part of the solution. Support WWF today